行行出狀元：化出花容月貌 鬚眉不讓巾幗

男兒也可以為美麗掌舵！化妝界向來是女人天下，但近年不少年輕男士決意闖關，走進這個傳統由女性主導的行業，為愛美女士們化妝扮靚，又開化妝班授徒。他們憑藉男士審美觀這份獨有的優勢，日漸受到市場重視，在這行業愈做愈吃香。他們，就是美麗妝容的幕後功臣–男化妝師。

「八年前我啱啱入行，嗰時十名化妝師，先得一名係男性，依家完全唔同晒，男女差唔多各佔一半。」Rex投身化妝界近九年，見證化妝師行業的轉變。回想當初，他學畢化妝課程後，在化妝櫃位工作四年間，曾遇過不少奇異目光，「試過有老竇陪個女嚟買化妝品，佢見到我就好疑惑咁問個女：『點解會有男仔做化妝？』又有啲客怕尷尬，會特別要求女化妝師。」

「女仔扮靚都係畀男仔睇」

近年，男性化妝師由冷門行業搖身成為「大熱」，Rex娓娓道出箇中原因：「女為悅己者容，女仔化妝扮靚，都係想畀男仔睇、想畀人讚，佢哋其實最想知道男性點諗，所以佢哋會接受男化妝師嘅審美觀。另外，男化妝師本身唔會化妝，幫人化妝時會客觀啲，唔會將自己鍾意嘅妝『倒模』喺客人身上。依家啲客反而指定要男化妝師，因而吸引多咗人入行。」

現時，很多大型化妝店都有駐場男化妝師，成為男士投身化妝界的主要途徑，一般起薪點約一萬二千元。入行近三年的阿東，當年中學畢業後，邊修讀化妝課程，邊兼職做櫃台化妝師，後來赴英國、台灣等地鑽研化妝技巧，「做化妝櫃台每日都會接觸好多客，係一個短時間提升化妝技巧嘅好機會。雖然有唔少化妝師獲國際認可證書，但我哋呢行唔睇證書，面試時被要求即場示範，講到底，實力最重要！」

「同客傾偈設計個性妝容」

化妝行業主要以project-based，工作以時間計算，每小時平均約一千元。阿東現時主力替藝人化妝，客人都是儲回來，「每次出job都係一次性，所以口碑好重要，如果化得好，個客會將你推介畀朋友。」此外，他特別注重「溝通」，「多啲同啲客傾偈，可以從中了解各人喜好，化個適合佢哋個性嘅妝容。」

今年年初，他更開設化妝公司，開班授徒，常以過來人身份鼓勵男學生，「好多男仔本身無咩化妝知識，相比女仔，佢哋起步會慢啲，但呢行最緊要有心學、多練習，一定可以後來居上。」

為人化妝，看似輕鬆，但Rex提醒新入行者要有長時間工作的心理準備，「好似婚宴化妝，由朝早六點做到晚上散席，成十幾個鐘，有時連食飯時間都無。」對他而言，化妝工作可帶來莫大滿足感，「曾經幫一位新娘化完妝，佢開心到喊，因為佢從來無化過妝，未見過自己咁靚，佢老公仲當場話未見過老婆咁靚！」

點樣入行?

1.報讀化妝學校，透過出騷實習，建立人脈關係。

2.到化妝品公司任職品牌化妝師，累積經驗。