SUN奇古怪：Sun潮語【大檸樂】

香港秋冬天好耐未試過咁多雨水，近年又咁多地震海嘯，莫非同瑪雅人嘅傳說話12月21日之後，黎明就不會來？最近，喺網上見到大陸有間公司甚至喺嗰日放假，等啲員工可以喺世界末日前同家人一齊相聚攬炒！但如果真有其事，文明就會瞬間毀滅，人類就會大量死亡，諗落……都幾「大檸樂」。

不過有無世界末日都好，生活都係咁過，潮語都會繼續講。但係點解世界末日又會關「大檸樂」事？

「大檸樂」照字面解係「大杯檸檬可樂」嘅簡稱，係消暑又解渴嘅怡神飲品，愈飲愈開心。但潮語「大檸樂」其實係港式粵語「大Ｘ鑊」嘅諧音，意思大家都知係出咗啲唔好嘅事，仲要係大大件事，仲可能會係牽連甚廣嗰隻，隨時要搵人孭鑊謝罪。

「大檸樂」讀音同「大Ｘ鑊」相似，又無粗口成分，於是近年畀人講吓講吓，就成為潮語。

女士們遇到「大Ｘ鑊」的事都可以大叫「大檸樂」嚟抒發一下情緒。不過最大鑊嘅係，其實「大檸樂」同「大Ｘ鑊」嘅大鑊程度，係無乜分別，一樣係鑊，一樣要搵人孭。

香港自從七月新政府上台開始，都係鑊鑊新鮮鑊鑊甘！「大檸樂」源源供應，高官班子個個排住隊出事，令到施政原地踏步，搞咗半年，實質咩都未郁過！日日畀人質，左一鑊右一鑊，真係飲「檸樂」都飲死。香港日日吵吵鬧鬧，亂七八糟，真係咪話唔大鑊。再咁搞落去，唔使等世界末日，香港嘅末日都已經臨近！

各位……悔改吧！