政壇:搞搞政:長津放水長毛好演技

立法會財務委員會前日戲劇性通過長者生活津貼撥款(長津),雖然一眾泛民議員猛鬧政府偷襲,但據我哋綜合各方消息,今次事件疑似係一幕精心策劃、按劇本上演嘅「剪布大騙局」,勞福局局長張建宗同財委會主席張宇人表現肉緊,但最佳男主角都非長毛梁國雄莫屬,佢喺會議上爆玻璃、發爛渣,事後悲傷道歉等都令人拍案叫絕。

劇本之初係張建宗先扮委屈撤回舊文件,要求優先處理份補充文件中嘅開位申請,張宇人裁定呢份係新文件後,財委會就長津撥款審議嘅所有程序雖然要由頭做過,但亦攬住長毛提出嘅三百零二項「拉布」動議一齊報銷。其後張宇人輕描淡寫叫議員就議案發言,見冇人發言,又要求舉手表決等,一切按劇本而行,長毛雖有不滿,但張宇人一句:「如果你不滿我嘅裁決,你可以去司法覆核」,直頭係大戲嘅點晴之作。

呢場戲嘅焦點係長毛係咪真係畀政府「偷襲」﹖有泛民中人就爆料話,其實早有公文袋成員喺財委會審議「新文件」前已經提醒長毛,佢啲拉布動議變晒廢紙喇。長毛呢頭「放水」,嗰頭又見情緒激動爆玻璃被鎅親手,難怪畀人話佢演技媲美影帝喇!

第一手消息請下載on.cc東方互動iPhone/iPad/Android/Windows Phone Apps

設計圖片及對白