政壇：岑建勳鬧爆激進青年

近年退居內地做電影生意嘅前演藝界名人岑建勳（John）係七十年代社運老兵，港英時代曾為爭取中文成為法定語言同反貪污被拉過十三次，早前更絕食支持反國民教育運動添！尋日佢出席個電台節目時，揶揄部分激進後生仔揸住支港英旗遊行，學人緬懷過去，但佢哋根本冇資格！

火氣十足嘅阿John批評，依家有班人對事情立場非此則彼，係咁講自己立場嘅同時，又唔肯聽人哋意見，咁搞法只會造成社會撕裂，形成愈嚟愈強嘅對立面。近期有後生仔揸港英旗遊行宣揚「港獨」，食鹽多過後生仔食米嘅阿John笑言，班細路得嗰廿幾歲，連港英旗同龍獅旗都未識分，有幾認識港英時代嘅香港？根本冇資格學人緬懷過去喎！