政壇：楊孫西拉隊歎極品茅台

由貴州茅台集團及香港國酒茅台之友協會聯合主辦嘅鵬城之夜，前晚喺深圳喜來登酒店舉行，協會監事長兼全國政協常委楊孫西拉隊北上，同茅台酒公司董事長袁仁國等老友共聚，呢晚筵開六十幾席，中港數百名茅台發燒友盡情享受珍藏五十年嘅極品茅台。

大會預備咗一百支五十年極品茅台酒供大家享用，近年茅台極之渴市，身價暴漲，每支市價高達十萬港元。出席盛會嘅有福建僑領施子清及兒子中華廠商聯合會會長施榮懷、百仁基金會主席施榮忻，仲有楊孫西嘅公子菁英會主席楊華勇、協會秘書長吳永嘉等。