政壇：譚志源高帽笠劉江華

俗語話高帽唔怕戴，但用喺政制及內地事務局局長譚志源（Raymond）身上，卻應該話係高帽唔怕派。本報前日率先報道，喺立法會選舉中慘敗嘅民建聯副主席劉江華，極有可能出任政制及內地事務局副局長，即係做Raymond嘅副手，消息曝光後引起政圈熱烈討論，支持同反對聲音都有，尋日連Raymond都講埋一份，但佢就曲線撐劉江華，話佢係「好資深嘅政治人才」，讚到對方仲叻過自己咁。

推銷政改拍住上？

劉江華入政府嘅消息曝光後，引起政壇不少震動，但身為當事人嘅劉江華卻一直未有現身說法，就算佢所屬嘅民建聯核心成員，幾乎都統一口徑話問番當事人喎，就連傳聞係佢頂頭上司嘅Raymond都話，劉嘅去向應該問佢本人。

搞笑嘅係Raymond一邊開宗明義話唔會就揣測性傳聞作評論，但轉個頭就侃侃而談，大講劉江華喺政壇嘅歷史，如數家珍話劉自回歸前已開始做區議員、區域市政局同回歸後嘅立法會議員，之後又喺民建聯處理黨務，加上過去多年作為行政會議成員直接參與制訂政策工作，所以喺從政、地區等方面經驗都好充分喎。

咁都未夠，Raymond再斬多幾両，話政治人才本身喺不同崗位服務，社會上係願意見到，咁係咪暗示政治人才換條跑道，大家應該預咗呢？點都好，政制及內地事務局嚟緊嘅工作好艱辛，Raymond提早向劉江華派高帽，莫非係為未來雙方「拍住上」推銷政改做定準備？