政壇：陳凱欣人工十萬唔易賺

做官少不了拜會立法會，尋日兩位返咗工冇耐、曾經任職傳媒多年嘅財政司司長政治助理羅永聰（Julian），同食物及衞生局政治助理陳凱欣就急急腳去立法會，返咗工三日嘅陳凱欣話，任職傳媒多年，但以往負責採訪醫療方面嘅新聞，依家工作性質唔同，所以樣樣都要學，十萬蚊人工真係唔易賺o架！

陳凱欣話，轉行後返工時間同以前差唔多，不時星期六、日仲可以放假添，不過開會多咗、時間長咗、應酬亦密咗，變相同讀緊幼兒園嘅囝囝以及五個月大嘅囡囡相處嘅時間都少咗，以前返工，可以不時打吓電話畀囝囝傾兩句，依家就難喇。至於囡囡仲食緊母乳，所以喺早上除咗要送囝囝返學，仲要泵定啲母乳畀囡囡，官場女性真唔易做！至於Julian，佢返工近一星期，出席過銀行家嘅活動。