政壇：Tree根變身網絡護衞

網絡世界千奇百怪，早排城中爆出「五百蚊人情」事件，議論去飲畀五百蚊人情嘅女主角因而成為一時熱話，更慘被網民人肉起底，好多個人資料都畀人公開咗，呢件事備受關注，但勢估唔到要拎上立法會傾嘅人，卻係建仔直選議員鍾樹根，佢最關注嘅係如果畀人起底，可唔可以報警求助。被網民戲之為Tree根嘅鍾樹根本身都係網絡論壇常見人物之一，佢今次肉緊出手，到底係深有同感？定係有心做網絡護衞呢？

頻頻出醜成網民寵兒

鍾樹根已經排咗喺下個禮拜提出質詢，佢嘅問題包括：如果網民發現自己畀人起底後，同時向政府同警方求助，到底政府可唔可以提供幫助？同埋兩者到底可以點幫求助人？同時，又關注政府究竟有無做好青少年教育工作。

最後一個問題覆蓋範圍真係好似海咁大，青少年教育工作涉及好多方面，如家庭、學校甚至朋輩，點會係政府孭得晒o架呢。至於報警同政府點幫，睇怕依家好多受過網絡圍剿嘅人都想知。鍾樹根咁關注網絡欺凌，唔知同佢入咗議會錯字連篇、頻頻出醜，更因而成為網民寵兒有冇關？但佢抓住今次事件，都可以喺議會主攻網絡欺凌問題，畢竟智能手機進一步推動網絡普及，網絡欺凌問題真係唔可以睇小。

講開又講，關注「五百蚊人情」嘅議員其實唔止佢一個，保險界嘅陳健波都有提問，但關注點就同鍾樹根好唔同，譬如陳健波關注過去五年私隱專員收到幾多投訴係關於網絡欺凌，同埋有無人因為咁畀人起訴。真係估唔到同一條質詢，都有咁大分別。