人人暢道通行 切勿阻頭阻勢

好囉，好囉！行政同立法難得有共識，終於唔再阻頭阻勢囉！

咩事咁興奮？大家唔好誤會吖，太一叮唔係講緊長者生活津貼，而係指天橋及隧道等行人通道增設升降機咋。係咁嘅，政府為推動公共行人通道增加無障礙設施，向立法會財委會申請一次過撥款一點八億元，順利獲得通過，相信工程可以如期展開，你話係咪好難得呢。

當局推出「人人暢道通行」無障礙設施計劃，建議喺全港二百三十幾處行人天橋、隧道及高架行人路加設升降機，已經有超過十個項目開始施工，另有一百六十幾個項目正等緊完成可行性研究同申請撥款程序。

遲到好過冇到，「民生無小事」唔係靠把口齋噏o架，改善無障礙通道早就應該做喇。前朝政府得過且過，曾蔭權貪威識食，對行人通道設施殘缺不全詐傻扮懵，對殘疾人士及老人家出入不便闊佬懶理，改善工程拖得就拖，一味將包袱留畀繼任人，正一縮骨到冇朋友，叮！

講開拖得就拖，太一叮真係要狂叮煲呔曾。港府早喺回歸前已經制訂咗《殘疾歧視條例》，規定新建築物或現存建築物嘅設計及建造，須向殘疾人士及其他有需要人士提供適當通道或設施。點知當局好似手電筒咁，照人唔照自己，原來無障礙通道嘅規定並唔適用於政府建築物，簡直就係雙重標準。呢嗱，房署總部大樓就係因為缺少無障礙設施，令行動不便人士望門興嘆，畀人投訴到爆。

更離譜嘅係，《殘疾歧視條例》出台近廿年，但當局一直宣傳不足，好多大廈嘅業主立案法團觸犯咗法例都矇查查，直到畀人投訴至知大件事，有啲更因為咁而誤墮法網，無端端惹上官非，搞到一身蟻，你話港府係咪靠害吖！

講多無謂，食多會滯，行動最實際。新政府要撥亂反正，適度有為，咁就要抓緊時間，速速落實，唔好再拖泥帶水喇。總之一句講晒，應做就去做！

講開又講，類似改善無障礙通道咁嘅利民工程其實仲有好多，譬如社區文化康樂設施嘅興建同維修保養、增加社區學童託管輔導服務等等。呢啲工程睇嚟好小事，但可以令市民直接受益，政客一般唔敢刁難，政治爭拗同阻力相對較小，所以咯喎，政府更應該加快速度，加多兩錢肉緊，令到工程可以盡快展開，咁就利民利己，功德無量喇！