SUN奇古怪：Sun潮語：【爆趣】

廣東話精妙之處，就係一個普通字，可以繪聲繪影咁形容一件事，而最重要嘅係嗰個字嘅本義，可以同所引伸嘅含意完全唔同。例如個「頂」字，本身意思係形容「頂」級，或形容動作「頂」住，但自從八十年代有一句港諺叫「頂你個肺」流行之後，「頂」字就變成咗「頂你個肺」嘅簡化版，成為潮語中一種情緒嘅宣洩，甚至有人會將呢個字作為粗口嘅替代字。

另一個最近成日聽嘅潮語單字就係「爆」。爆字本身有爆炸的意思，令人感覺震撼。所以傳媒界會用「爆料」去形容一啲震撼性嘅報道，又或者當有公眾人物或大機構被查出有啲作奸犯科嘅情形，亦會用「爆出醜聞」，久而久之個「爆」字，變成一個具指標性嘅用字。今日「爆」已成為香港最常用嘅形容詞之一，「爆like」、「爆笑」、「爆缸」、「爆型」、「爆索」……喺香港呢個社會，總之乜都要「爆」！

潮語「爆趣」顧名思義就係極之為有趣嘅意思， 呢個「趣」其實係出自早排CCTVB一個遊戲節目《千奇百趣香港地》，節目中會播出一段奇趣事嘅片段，然後主持就叫明星嘉賓畀分，評分以「趣」為單位，愈多「趣」即係愈高分。如果超級有「趣」，高分到「爆燈」，就為之「爆趣」，近日仲成為日常用嘅潮語。

最近最「爆趣」嘅事，莫過於亞視高層連同一班永遠都唔出名嘅藝員去政總示威，反對政府多發新電視牌照，睇佢哋上上下下一齊跳「亞視Style」，我覺得唔止「爆趣」，直情令人「爆血管」！