政壇：政商定格：陸恭蕙一家溫馨歎中茶
自從Christine陸恭蕙出任環境局副局長後，忙到連同屋企人飲茶都冇時間。前日中午大約一點鐘，喺金鐘中信大廈一間酒樓見到佢同幾個人開枱歎一盅兩件，其中一位洋人男士，貌似電訊公司前高層嘅Christine男友何力勤，仲有位活潑可愛嘅混血女童穿梭兩人之間，估計就係佢嘅寶貝女，同枱仲有一男一女老人家，似足溫馨嘅三代同堂。不過，我哋向佢求證，佢就乜都唔肯講，只話係朋友同屋企人飲吓茶喎！
席間Christine唔多講嘢，心事重重，多數係何力勤同兩位老人家傾閒偈，而囡囡就專心玩手機。不過當囡囡靠埋佢身邊時，佢就慈母上身，成個人軟化晒。咁啱佢由前日起署理環境局局長，唔知係咪心情未敢放鬆呢？
囡囡（右）不時靠埋陸恭蕙（中）身邊，兩母女感情融洽。
貌似何力勤嘅洋人男士，講到指手畫腳。