政壇：林健鋒做行會車位大王

政府呢頭追加兩辣招急凍樓市，嗰頭車位售價就拾級而上，喺全城炒車位嘅熱潮下，一個二手車位炒到過百萬元成交亦一啲唔奇。原來身為行政會議新貴嘅經民聯副主席Jeffrey林健鋒亦儲埋十幾個車位咁多，車位價升咁多，咁咪好和味。

根據尋日公布嘅行會個人利益申報，Jeffrey手上一共有十五個車位咁多，其中工廈車位就有八個，而呢排最吃香嘅住宅車位都有七個咁多。不過，佢話呢啲物業車位都係透過名下公司持有，所以呢啲車位係公司擁有o架喎，身位股東之一嘅佢係唔可以隨便用嚟炒賣。

葉劉會長銜頭取勝

唉，其實佢又使乜靠炒車位賺錢吖？事關呢位商界代表喺東區有成幢工廠大廈，另有六個工廈單位，內地仲有兩間廠同六幅地，仲係十九間公司嘅受薪董事，淨係高爾夫球會籍都有四個啦，就算車位價錢翻一番，都唔知夠唔夠錢交佢啲高爾夫球會籍費。

至於另一行會新貴、新民黨主席葉劉淑儀申報表上晒出一抽近八十個「名譽會長」，當中有部分係紀律人員工會組織，相信係佢之前做過官嘅緣故。此外，佢仲係唔少地區組織、社團同婦女組織嘅名譽會長。唔通係插旗為選舉拉票？

佢就直言不諱話「咁直選係咁o架啦！」又解釋，做得直選議員，好自然要同地區人士多啲接觸，如果人哋叫到佢做榮譽會長，佢多數都來者不拒，所以蓄埋蓄埋就有近八十個咁多囉！

咁唔知佢身為漁民互助社同香港漁民團體聯席會議嘅名譽會長，今次立法會選舉又有冇得到班漁民相助呢？佢就話都有少少o架，仲話班漁民有時會一批批咁搵佢喎！