去年包尾追到奪冠威震港澳

【本報訊】在澳門「戰死賽道」的丘永材，是有十多年賽車經驗的車壇老手，他曾向友人稱「好想戒咗賽車毒，專心打理生意，做番個好男人」，但去年他以日產GTR35參加澳門路車挑戰賽，由包尾追到奪冠，創造神話而名震港澳車壇，遂雄心再起今屆「升呢」再戰，他在出賽前面帶笑容稱：「因為上年贏咗，喺第五十二屆都係揸呢場賽事，都有CDM級，但係依家見好多都用廠車去比賽！」所以「希望買架廠車試一試自己Level（水平）去到邊」。詎料，一個彎位，令這位新車神永別賽道。

「改車達人」經營車房

洋名Philip的丘永材，生前熱愛賽車玩車，曾在facebook向友人稱：「做幾辛苦幾唔開心都好，跳上車戴好安全帶、開車，任何事都可解決。」丘本身經營車房，擅長車輛改裝，有「改車達人」的綽號，九九年成立以中國珠海國際賽車場為基地的KC Racing賽車隊。

丘經常現身大型賽事，○五年時亦曾在澳門電訊盃亞洲房車賽中奪冠，但最經典是去年十一月，他參加澳門路車挑戰賽，在起步階段因死火包尾，後來因有車手發生意外，令前後車距離拉近，加上避開多宗意外，令他成功追近主車群、在第九圈攀升首位，最後奪冠。

雖然早有退出賽車的想法，但對車的熱愛令他欲罷不能，今屆他購買昂貴的新車再戰，賽前他透露：「我去咗肇慶練咗架車先，之後試咗個setting，咁就希望校高少少啱街道賽個setting，會好啲囉，今次準備係咁囉。」他還稱，希望有「多啲時間練習」，期望比賽時「天氣好啲，同埋唔好咁多紅旗出現」，然而一場意外竟成永別賽。