增加龕位年年拖 生老病死樣樣難

香港地做人難，做鬼亦難，連骨灰龕位都要爭崩頭，唔少人生無片瓦遮頭，死無葬身之地，講起真係淒涼。

由於公營骨灰龕位嚴重不足，有人乘機博大霧，搞到無牌龕場遍地開花，鄉郊紛紛淪陷，連市區都烏煙瘴氣，市民怨聲載道，政府居然束手無策。食物及衞生局局長高永文承認，目前無任何法例監管無牌龕場，只可以引用其他法例對付，「盡力而為」喎。

嗱，高局長都承認龕位供應量滿足唔到每年四萬個嘅需求，但要搵地方建龕場有困難喎，包括土地供應、居民抗拒及交通配套等問題。總之一個字：難！

講嚟講去，都係曾蔭權前朝政府靠害，骨灰龕位長期供不應求，市民強烈要求增加供應，佢就詐傻扮懵玩拖字訣，咁多年一事無成，無牌私營龕場有乜法子唔氾濫成災吖。

呢，今年年初本報踢爆，有人懷疑喺蒲台島違規興建墓園，又斬樹，又挖土，搞到「香港南極」淪為「千墳島」。雖然城規會事後亡羊補牢，暫時凍結蒲台島發展，可惜遲咗喇，鳥語花香嘅蒲台勝景已經永遠消失。仲有吖，發展商喺鄰近郊野公園嘅大埔沙螺洞起大型骨灰龕場，曾蔭權政府居然隻眼開隻眼閉，做埋破壞生態環境嘅幫兇，叮！

新政府話「民生無小事」，家陣港人生老病死樣樣難，點會有小事吖。正所謂，無規矩不能成方圓，加快立例監管私營骨灰龕，堵塞漏洞刻不容緩。不過咁，講到尾只有增加公營龕位供應至止到咳。冇錯，骨灰龕用地可能同房屋、公用設施爭土地資源，亦可能引發社區人士嘅反對甚至抗爭，但政府唔可以一聽到反對聲音就打退堂鼓，應該堅持嘅就要堅持，應該企硬嘅就要企硬，否則問題只會愈積愈多，愈拖愈難解決嘅咋。

冇錯，本港土地有限，骨灰龕位需求無限，呢個問題確係幾棘手嘅。其實，處理骨灰有好多辦法，譬如海葬，往生之後魂歸大海，係唔錯嘅選擇。近年選擇海葬嘅市民愈來愈多，幾年間激增數倍，如果當局加強宣傳，安排好啲，完全可以紓緩骨灰龕位不足嘅壓力。一句講晒，事在人為，關鍵係政府肯唔肯做嘢，得過且過，拖拖拉拉，梗係乜都做唔成喇，叮！