SUN微博：立會一舊雲

立法會再起「瘋」雲！新丁議員黃碧雲日前撳錯掣投錯票，全城鬧爆，原因撲朔迷離。有網民分析，假設佢係色盲分唔到個掣嘅顏色，佢可以睇個掣嘅字；假設佢係文盲，佢可以問人，唔明點解會撳錯掣喎！口痕網友就話，會唔會係黃碧雲見到小強(曱甴)，驚到腦部出現反射性肌肉抽搐，一舊雲咁撳錯掣呀？有網民就反駁，點解見到小強會放生呢？唔通佢學咗黃子華養小強，仲要高呼「我有小小強」？唓，可能黃碧雲原想拍死小強，拍咗落個掣到唔得咩？

咁究竟真正原因係咩呢？全世界都（目及）住黃碧雲個facebook，又問佢點解釋今次嘅不可思議投錯票事件，黃碧雲暫時未有解畫，但有人留意到佢有個post，話自己「已提出一次口頭質詢……一次書面質詢……一次動議辯論」，「一年的議會工作已差不多在第一個月的議會生活中完成了」。網民睇都嘩嘩聲，質問黃碧雲連票都投錯，仲好意思咁大口氣自誇一個月做咗一年嘢？不過，fb呢個留言好似消失咗，究竟係有人冒充黃碧雲搞鬼，抑或佢知出事，急急delete咗？成件事真係疑「雲」密布呀！