SUN奇古怪：Sun潮語【收兵】

網上流行一首二次創作嘅歌，名為 《收兵好過嫁人》，改編自陳奕迅嘅《落花流水》，並由高登巴打填詞。

就咁睇歌名，真係唔知首歌講乜。點解「收兵會好過嫁人」呢？收兵又係咩意思？黑社會收就聽得多啫……收兵？莫非係有人喺香港秘密徵兵，組織軍隊搞「港獨」？

聽晒首歌先知，原來改編嘅歌詞係講一啲男仔，不斷被女朋友耍，埋怨終日要為她做牛做馬兼斟茶遞水送禮，慘歷兩年最後仲要被人飛埋，歌詞大力控訴前度女友花心。

歌詞中有一句：「條女很清楚，收兵好過嫁人，真的身份不過女神！」原來 「收兵」唔係為打仗，而係解為供奉觀音大士！

潮語「收兵」意思即係話一啲女仔周圍「收觀音兵」。女仔「收兵」嘅目的好簡單，當然係希望更多男仔對自己好。有人成日圍住自己團團轉，仲隨時有人管接送，大時大節生日又收到大量禮物，又難怪有啲女仔會覺得收兵好過嫁人嘅。

不過最慘係啲裙下之臣，即係一眾巴打，為咗自己心中嘅女神，付出咗大量金錢同時間，最後都唔知為誰癡心為誰忙。喺人財兩空嘅情形底下，形單影隻咁對住一碟火腩飯，嗰種孤獨嘅滋味，真係Inevitable……

所以通常「收兵」係男仔喺網上唱衰一啲女仔嘅時候會用到，而日常對話亦開始流行。 被指「收兵」嘅女仔好多時候亦同時被扣上 「港女」嘅帽子。

不過「收兵」都唔淨係香港女仔會做，呢樣嘢全世界都有，有時又唔怪得晒啲女仔，有部分港男真係有「斯德哥爾摩症候群」嘅，係要畀啲港女虐待先開心，一個願打一個願捱……咁又怪得邊個呢？