政壇：搞搞政：小死後揀撒骨灰高永文好灑脫

香港地少人多，居住係大問題，更因骨灰龕位不足，城中人連身後事都要煩惱。本身係骨科名醫嘅食物及衞生局局長高永文，尋日去咗和合石墳場為一個植樹活動主禮，並參觀和合石新靈灰安置所及火葬場，講到身後事嘅睇法，高醫生好灑脫，叫台下嘅人幫佢做見證，聲稱自己死後會選擇撒骨灰，藉此宣傳減少骨灰龕位嘅需求。

高醫生出席活動時，都講到未來需要增三十至四十萬個龕位，亦坦言搵適當地點嘅困難，所以佢用自己為例，話到明身後毋須骨灰龕位，撒骨灰就得喇。佢咁樣百無禁忌談及身後事，呢個官真係唔易做。

尋日好猛太陽，高永文行咗一陣就口渴去攞果汁飲，但就叫個侍應加入有汽礦泉水，佢話依家市面出售嘅飲品太甜，應該要加水開稀，留番少少甜味就夠喎。高局長飲完果汁潤喉，轉頭就走去同在場嘅小學生吹水，由做運動傾到環遊世界，再一次見證局長嘅親和力。