政壇：吳克儉澄清絕無私生女
早前飽受德育及國民教育科風波困擾嘅教育局局長吳克儉，近日又畀網民指佢涉「私生女」傳聞，問責局長有婚外情甚至私生女真係可大可小，吳克儉尋日出席活動後即刻闢謠，話傳聞「純粹惡搞，絕無其事，子虛烏有」。
據聞呢個傳聞首先喺兩個網頁中流傳，話吳克儉同某內地女子有「風流帳」並誕下私生女，又指稱該名內地女子曾從深圳抱住「單非囡」來港注射疫苗搵人幫手，又話雙方正爭奪呢個「私生女」嘅撫養權喎。被問及係咪成日返回內地甚至有內地女朋友？吳斬釘截鐵澄清話冇，又強調唔係成日返內地，僅承認曾去上海講學喎。