政壇:袋巾KK賊喊捉賊

四十萬長者幾時可以攞到長者生活津貼,視乎由泛民打響嘅拉布戰幾時落幕,反對撥款嘅泛民議員同工聯會議員都被指係阻住地球轉嘅黑手,但公文袋嘅梁家傑(袋巾)、白鴿黨嘅劉慧卿尋日出席一個電台節目時,卻一邊指摘政府借長津派錢「買民望」,一邊憤慨政府寸步不讓。同樣出席活動嘅工聯會黃國健(KK)則繼續企硬,其實係佢哋要求政府撤銷資產審查派大錢、濫派錢喎,點解轉過頭又賊喊捉賊呢?

截長者水喉「講數」

長津爭拗已演變成社會各階層都參與嘅討論,泛民政黨以基層利益為由,係都要推翻政府嘅建議,藉此抽水,圖登上「為市民爭取更多福利」嘅民望高點,但立法會嘅拉布戰卻搞到長者同社會嘅耐性愈來愈小,更討厭呢啲阻住晒嘅政黨。

勢色唔對下,袋巾尋日就喺電台節目中推卸責任,反鬧長津係特首梁振英「買民望」嘅工程,目的係為將來唔推行全民退休保障而鋪路;KK唔肯講會否轉軚,繼續話要為七十歲以上長者爭取撤銷資產審查。最搞笑嘅係白鴿黨劉慧卿,佢直言政府今次派錢嘅手法拙劣,當啲議員係橡皮圖章。

明眼人都知,依家連本港社福界人士都贊同長津計劃應設立資產審查,否則好多唔應該受助嘅人會當長津係免費福利,攞得就攞,最終受害嘅係香港納稅人,偏偏泛民同工聯會等就民粹至上,不惜捏住貧困長者嘅水喉嚟脅迫政府跪低,只為抽水、攞威,依家又倒打一耙鬧爆政府,都話官字兩個口,依家睇嚟,尊貴議員呢招似乎更高明!

第一手消息請下載on.cc東方互動iPhone/iPad/Android/Windows Phone Apps

設計圖片及對白