考試笑話百出 教育愈改愈亂

「一粒糖有兩張糖紙，兩張糖紙可以換一粒糖，媽媽如果畀十粒糖，你最後最多可以食到幾多粒糖？」大家放心，太一叮唔係要大家畀答案，只係想大家估吓條題目為邊啲學生而設。中三？中一？小六？錯，係小一。準確啲講，呢條係名校小學嘅小一入學試試題。

又睇吓呢條，「學生要專敬師長，待人接吻亦要謙遜。」呢個錯字連篇嘅句子又係出自乜嘢學生手筆呢？小六？中一？中三？錯，係中六。具體啲講，呢位錯別字大王係今屆文憑試學生。

你話係咪搞笑吖？一方面細路哥牙都未出齊，就要瘋狂催谷爭入名校小學，一方面中學生讀完十幾年書，答題作文居然錯字百出，烏喱單刀，鬧出「尊專」不分「物吻」不辨嘅笑話，香港教育究竟出咗乜嘢毛病呀？

嗱，病情真係唔輕o架，考評局發表報告分析首屆文憑試考生表現，發現考生嘅中文能力相當參差，其中落後一族嘅表現令人不忍卒睹。寫作試卷變錯別字大全唔在講，閱讀理解更加變死亡之卷，簡單幾個文言字詞已經將考生中文根基薄弱嘅問題暴露無遺。

講到中文差，末代高考生亦不遑多讓喎。嗱，蘇軾、陶潛同杜甫大名鼎鼎，小學生都識啦，偏偏有高考生答題時搬字過紙抄都抄錯，幾位大文豪無端端被追封謚號，變成「蘇車式」、「淘潛」同「社甫」。

學生英文程度每況愈下，通識教育通通唔識，已經唔係新聞，家陣連中文水平都去到呢個驚人程度，教育咁失敗，唔怪得愈來愈多後生仔唔認自己係中國人啦！

講起都搞笑，回歸十五年，教育政策就好似青春期女學生揀男朋友咁，五時花六時變。又母語教學，又語言微調；又考學生，又考老師；又通識教育，又改變學制……搞來搞去，學生成績不進反退，咁係咪弄巧反拙呀？咁係咪誤人子弟呀？

叮佢個鎯鎯，前朝政府成日發教育產業嘅春秋大夢，簡直笑大人個口。唔信鏡都信下數據吖，考評局報告顯示學生中文大倒退，中文科中三生有百分之八喺六年前成績達標，今年再考居然變肥佬。英文唔掂，中文倒退，教育產業從何說起呀？區域教育樞紐又點搞呀？

嗱，教育局局長吳克儉，如果閣下想民望回復合格水平，速速撥亂反正啦，仲有呀，唔好又搞三搞四搞殺校呀，如果繼續誤人子弟，你嘅民望成績一定低過錯別字大王o架，叮！