SUN微博：打橫嚟講：天地良心當狼肺

「打死不離親兄弟」、「上陣不離父子兵」，本是象徵中國傳統家族團結的諺語，也是聚積前人經驗的智慧，可惜，世間總有人會為私利、為錢財，而不惜挑戰或說蔑視老祖宗的明訓，最終後果如何呢？

咪遭人唾罵，睇佢唔起囉！

有間老牌食肆，老竇由大牌檔起家，搞到成為蜚聲國際的名店，連國家領導人來港的晚宴上，也要擺番隻呢間舖頭嘅燒鵝髀喺度先至和味；可惜，老竇兩腳一伸，細佬便出招奪權。

大佬一直傍住老竇身邊捱生捱死，主力做廚，盡得老竇真傳，懂得秘製美食良方；細佬生得命好，有機會出國唸書，仲係乜乜經濟管理學之類，讀得學位回流，返嚟幫老竇手，兩兄弟一個有實戰經驗、一個有學識加見識，做老竇的，肯定安心離去，讓兩人發揚祖業啦！點知，狼子野心，還要搞到告上法庭，將老店清盤，氣得媽媽日夜以淚洗面，大哥亦病逝，法官結案時，不留情地斥責細佬不仁，而老伙記和老顧客亦不滿食品水準下跌，更差到被米芝蓮「搣星」降級，老父幾經艱辛打拚出來的江山，就被「無情無義」的猙獰所毀。有人說：「對得住天地良心。」如果是一個孝順仔，得悉老媽傷心痛哭的話，我就寧願斗零唔要都要保住親情、保住媽媽的感受、保住老父的家業名聲。今天，一Q清枱矣！

在此說，我再不會去幫襯呢間食肆，立此存照！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：樓市辣招

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot