政壇：政商定格：朱曦借西瓜谷台港互惠
前日銅鑼灣一間超市舉行台灣美食巡禮，台北經濟文化辦事處處長朱曦、新上任嘅台北貿易中心主任孫至誠都去撐場。朱曦睇見大大個台灣黃肉西瓜，忍唔住拎上手拍番幾下，仲話西瓜要拍出「咚咚」聲先係靚貨。不過細心一睇，佢手上嘅西瓜竟然要價一百元以上，夠普羅市民食兩餐飯！
朱曦趁機催谷港台建立貿易合作安排，佢話日前政務司司長林鄭月娥出席一個論壇時話，希望港台之間可以建立類似中港之間嘅CEPA，或者中台之間嘅ECFA，佢樂見其成，希望港府盡早提出具體方案。雖然香港唔使徵收關稅，台灣貨物來港唔會因為免關稅而降價，但若然吸引更多入口商加入競爭，或者通關更便利，令貨物運輸成本下降，價格自然會跟住減，到時一個西瓜就唔使成百蚊咁貴喇！
朱曦（左）同孫至誠都對台灣美食愛不釋手。