政壇：政商定格：租金暴升阿一要諗搬舖

理工大學總裁協會（CEO Club）日前舉行新一屆理事會就職晚宴，新任理事長兼「假髮大王」CK趙振國、副理事長德國寶老闆陳國民等總裁級人物齊集，以炮製鮑魚聞名嘅富臨飯店創辦人楊貫一都有到場。阿一專登去撐契女兼入室弟子陳玲玉嘅場，有「國家非物質文化傳人」封號嘅陳玲玉，藝術造詣高深，是夜自彈琵琶，獻唱經典粵曲，博得滿堂喝采。

講起生意經，阿一最頭痛嘅莫過於要搬舖，雖然政府出招只係針對住宅物業，但佢希望商舖租金都有機會回落。約半年前，有租客向業主漫天開價搶租，依家銅鑼灣富臨交緊七十萬元月租，但叫價已去到一百三十萬元、一百七十萬元，搞到佢冇晒心機，打定輸數搵新舖。佢語重心長話，政府真係要做啲嘢穩定租金市道，連佢做鮑參肚翅生意都唔夠交租，何況一班小商戶呢？佢希望依家形勢有變，明年下半年租約到期時租金回落，可以唔使搬喇！