政壇：搞搞政：立會P牌仔搶唔到風頭

新一屆立法會尋日舉行首次答問大會，特首CY梁振英總共答咗十八位議員嘅問題，當中有十四個係新人，發覺佢哋嘅發言內容唔夠聚焦搶唔到風頭，睇嚟呢班「Ｐ牌仔」要加把勁嘞！

雖然工程界盧偉國搶閘問到首條問題，但竟然冇好好把握機會，一開始就用CY競選政綱「穩中求變，適度有為」幫政府講好話，又問政府會唔會為基建發展制訂長遠規劃同優化相關諮詢機制。

新民黨副主席田北辰喺提問時，仲自爆未寫好講稿。正當大家以為做大生意嘅佢會關心外圍經濟情況時，佢竟然問CY上任至今有冇推行政策改善港人英語質素，又問CY願唔願意接受挑戰，要求行會每次開會都講英文喎！

人民力量「慢必」陳志全就話依家立會啱啱開始，同事連「櫈都未坐暖」，政府就要攞啲老人家做人質同立法會玩「show hand」，喺長者生活津貼上企硬唔肯畀多一個月追溯期，搞到行政同立法機關關係緊張。佢之後又用「非不能也，實不為也」鬧CY唔肯喺呢件事上為老人家開先例，雖然佢都算講得唔錯，但略嫌照稿讀有啲生硬，睇嚟下次都係背熟啲好。