政壇：范國威亂黐貼紙博宣傳
當選立法會議員後，變咗「雙料議員」嘅Gary范國威知名度大增，但代價就係一言一行都畀人全方位監察。最近有人向我哋報料，話佢喺立法會選舉前後，曾喺至少四款介紹政府政策嘅小冊子同單張中，貼上有個人簡介同肖像嘅貼紙，有個別貼紙仲貼正負責製作該本小冊子嘅政府部門之上，難免令人誤會有關內容係咪佢有份出品。我哋曾就此致電Gary查詢，惟直至截稿前都未獲回覆。事實上有區議員曾因喺區議會印製嘅月曆貼上宣傳自己嘅貼紙，事後畀區會同事譴責，唔知Gary會否吸取前人教訓呢？
同樣畀人踢爆涉嫌違規嘅仲有西貢區議員「哪吒」方國珊。西貢區議會最新文件顯示，哪吒係選舉前後違規掛橫額嘅常客，最高峰時期違規橫額、海報等數目總和達二十四個。佢回覆時堅拒道歉，反指「違規有理」，重申自己係為市民服務喎。
范國威貼紙亂貼，政府刊物都唔放過。