炒場歪風禁不止 出招堵漏何太遲

開講有話，官僚好似四方木，唔踢唔郁，真係一啲都無講錯o架。

話說近年炒賣公共體育設施歪風熾熱，市民投訴不絕，連申訴專員公署同審計署都睇唔過眼，多次炮轟康文署管理混亂，漏洞多多，令炒場黨有機可乘。好嘞，康文署呢塊四方木畀人踢得多，終於識得郁一郁，尋日發表所謂改善訂場安排諮詢文件，係威係勢提出十招打擊炒場措施，包括收緊個人訂場時數上限、訂場期限由三十日前縮短到十日前、違規者可被暫停訂場資格一百八十日等等。

即係咁，遲到好過冇到，康文署依家至出手，遲就遲咗啲，但如果真係可以堵塞漏洞，解決問題咯喎，遲都唔緊要，最怕今次又係雷大雨小，虎頭蛇尾咋。大家都知，本港公共體育設施嚴重不足，有人望場興嘆，有人就利用漏洞霸佔場館，炒賣圖利，搞到市民怨聲載道，康文署失職，難辭其咎。

講開又講，咁多年來，港產官僚後知後覺，亡羊補牢嘅大龍鳳大家見得多，今次一口氣推出十招，究竟打唔打得，可唔可以杜絕炒場，仲要睇過至知。

其實，炒場歪風屢禁不絕，固然同制度漏洞有關，而好多時都係因為康文署闊佬懶理。例如當局規定使用體育設施者必須向場館職員出示身份證明文件，但有市民反映，經常見到有人攞住「黃牛場紙」入場，在場職員竟然隻眼開、隻眼閉，擺明有法不依，縱容炒場啦，叮！

最好笑嘅係，就算康文署出招補救，亦係甩甩漏漏，做啲唔做啲。近年愈來愈多炒場黨利用「執雞」制度圖利，申訴專員公署曾建議向「執雞」者收費，但康文署就以「不可行」為由拒絕，至於點解「不可行」，又講唔出理由，唔怪得有人質疑當局對炒場黨網開一面。

老實講，事在人為嘅啫，防止炒場一啲都唔難，難在港產官僚嘅責任心，如果康文署繼續敷衍了事，得過且過，推出幾多措施都係嘥氣喇。嗱，啟德體育城計劃近日引起好大爭議，有人建議推倒重來，將塊地改建住宅，而體育界人士就激烈反對，其實計太一叮話齋，就算體育城計劃不變，日後都要好好管理至得，否則，好似其他體育場館咁淪為炒場黨嘅生財工具，咁就唔起好過起喇，係咪！