SUN微博：打橫嚟講：讒臣無間道害老細

梁振英主政，當上香港特首之後，香港局勢紛亂，未曾停過。那「反國教」運動，剛遏息，氣還沒喘定，那個「長者生活津貼」的拗撬，又殺到埋身；加上水貨客死灰復燃，被「光復上水」的支持者高舉「將大陸人趕盡殺絕」嘅字牌周街遊；另外，政總門前的「公民廣場」瞓咗幾個絕食者要求不敢蒲頭的蘇錦樑局長面談「言論自由」；仲未計大埔龍尾爆出前朝埋下炸彈的「人造沙灘」之鑊氣……。

梁政府廚房已夠熱的了，哦！應說，像林子祥名曲：「快熱到爆炸」的了！在這惡劣情況下，不知哪個蠶蟲師爺竟「動議」「擱置」啟德體育城計劃，若非白癡無知，就係臥底無間道，「暗殺」特區政府！

每個冗員機構內，總有一批無能的讒臣，不知所謂地為爭表現，做啲禍延主子之能事。嗱！今劑啟德體育城計劃，早在梁振英競選特首時及上任前，已寫入政綱落實此項目，今天，一百日多啲，就「反面唔認帳」？咁無誠信，點再玩落去？

當然，大家都知，梁特首不一定拍板的，但那些蠶蟲師爺亦不會未得主子同意，就出嚟放風亂叫o架？所以，我文首質問的，是否那些不懷好意的搞事分子，有心嫁禍老細囉！

有點小常識（勿說政治智慧），都知今天局勢不穩，好應多做實事，有利大眾，而非無風起浪。得閒嘅，望吓塊鏡，照吓自己個樣，咪算囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府