政壇：政商定格：CY馬場宴請中總高層
俗語話「至怕改壞名」，樓盤都一樣，若然改到個好名，對銷情都大有幫助。中華總商會會長蔡冠深尋日出席該會一個活動時，講起佢公司新華集團喺天津國際金融中心新開嘅樓盤叫「公館1882」，「公館」嘅稱謂非常古雅，1882則係天津金融界崛起嘅年份。
除咗喺天津，佢透露中總將會喺珠海橫琴興建中總大廈，加強兩地經貿協作，珠海市政府仲委任咗佢做珠海市經濟顧問添。
尋晚特首CY梁振英喺跑馬地馬場宴請中總一班高層，財爺鬍鬚曾、特首辦主任邱騰華、商務及經濟發展局局長蘇錦樑都有出席，今次係CY因為諮詢施政報告意見，第三度宴請有代表性嘅商會。
梁振英（右）喺馬場宴請中總高層，同蔡冠深（左）言談甚歡。