政壇：搞搞政：鼠王芬「茶煲」建制都嫌煩

立法會司法及法律事務委員會主席一職多年嚟落入公文袋手中，經民聯嘅「鼠王芬」梁美芬今屆自動請纓做主席，為免主席之位再落入泛民手中，建制派簡直係眾星拱照、支持佢做主席。點知佢一當選已辣着火頭，主持首個會議仲因未當選已私下同秘書處商議更改開會時間，畀泛民圍攻，搞到要建制派開口幫拖。

已有激進派泛民揚言嚟緊會好好招呼鼠王芬，有建制派人士話咁搞法即係次次開會都要搵夠人坐定定喺度，準備隨時撐佢，咁咪好唔得閒？咁trouble（茶煲），所以有人就話下年唔會再撐佢做主席。有建制派中人都講，其實佢哋唔係冇法律界專才可以做主席，好似有「法律超人」之稱嘅謝偉俊，仲有代表中華總商會嘅廖長江，佢本身都係資深大律師，相信由佢做嘅話應該會穩陣啲。

點知鼠王芬話自己不嬲都淨係話做一年，下年嘅嘢下年先算，又話自己都唔係咁霸道。咁就要睇佢呢一年嘅表現喇！