政壇：大輝不念舊情狂插波波

隨着經民聯嘅林健鋒被吸納入行會，廠商會代表林大輝從此就喺立法會孤軍作戰。尋日仲背水一戰做咗場「單挑」表演，對手正係昔日最鬆散嘅五散人同袍，發展局局長「波波」陳茂波。

話說尋日立法會動議擱置新界東北發展計劃，波波重遊立會解開呢個棘手死結，點知畀泛民怒插都不特止，連昔日「戰友」林大輝都唔錫住佢。大輝先彈政府「梁十招」推出至今，效果成疑，佢仲勸CY「打電話」出招之前記得經下大腦添！佢講到興起仲燒埋波波，話波波有關醉駕同劏房單嘢仲未交代好，依家又拎住支火水試圖為啟德發展計劃救火，遲早燒死埋自已同體育界，後果堪虞，所以都係「穩中求變為上策」。

但另一唐營幕僚林健鋒入咗行會後，就全程拗腰傾力護航，話政府做事唔可以有掌聲先做、畀人鬧就縮、有爭議就撤，又叫政府早日交代清楚就可以令流言蜚語不攻自破，講講下仲話有人抽水借題發揮，搞到提出動議嘅白鴿黨劉慧卿出到會議廳仲指住佢嚟鬧添！