政壇：田二少寧棄舖唔「追租」

好多商家都話依家嘅經營環境好困難，事關唔止樓價高、舖租仲高，人工又高，都唔知頂得幾耐？頂唔住嘅惟有摺埋喇！

好似家族做紡織起家嘅新民黨副主席田北辰，本身開咗好多間時裝連鎖店，但入咗立法會後連公司業務都冇乜點理。不過田二少依然關心生意，佢尋日就慨嘆近期零售生意愈來愈難做，租金以倍數增加，但生意就愈做愈差。佢近日仲下令，講明旗下時裝連鎖店所有舖位都唔會「追租」，即係業主一旦加租，寧願放棄舖位都唔會捱貴租。

卡片設計有心思

嘩！睇得咁淡，唔通佢有水晶球，可以睇通未來嘅經濟環境？當然唔係啦，原來佢叫班員工賣衫時，順便做埋數據分析，問顧客幾條簡單嘅問題，如果係個人遊就將資料輸入電腦。田二少話就係咁統計，知道今年第三季嘅個人遊生意比舊年大跌四成，所以先決定全部舖位唔「追租」。

再講，田二少對服飾配搭亦相當獨到，仲好識襯衫，睇佢喺立會宣誓嗰日，同黨主席葉劉淑儀服飾嘅顏色襯到絕就知，但勢估唔到佢連印張卡片都花盡心思。人哋個個用白色做底色，佢就用灰色，而且張卡片仲要係撕極唔爛嘅。至於點解咁做，佢話自己做時裝起家，點都要與別不同喎！