巴士廣告偷雞 懵官漠視違規

人衰行路打倒褪，政府部門衰起上嚟，情況一樣o架咋。運都輸埋嘅運輸署又被申訴專員公署揭發失職，仲係四日之內被踢爆犯同一錯誤兩次，撞鬼！

乜嘢咁離譜搞到運輸署連環出醜呢？答案係：對巴士公司監管不力！

件事係咁嘅，與九巴同屬載通國際旗下嘅路訊通（RoadShow）被揭為求賺到盡，喺巴士違規超時播放廣告。運輸署規定巴士視聽系統每小時節目嘅廣告時段上限係兩成，亦即十二分鐘，路訊通違規最嚴重嘅時段居然高達九成內容係廣告。

事件係申訴專員公署收到市民投訴，跟進調查先至被揭發，你話運輸署係咪混吉o架？次次都係被人踢爆先至補鑊，運輸署知唔知醜o架？

路訊通又係極之唔對路，九成內容都係廣告，咪等如強迫乘客硬啃垃圾資訊？搵錢都唔好折磨乘客吖。你試吓返工九成時間被速銷電話騷擾吖，唔煩到嘔呀？所以咯喎，申訴專員公署就批評嘞，路訊通極不自律，而運輸署嘅監管更係形同虛設，明顯係行政失當！

無錯嘞，運輸署對巴士公司嘅監管真係形同虛設o架，何止巴士違規播廣告，巴士脫班更加無王管。大家都聽過「鬼巴士」o架啦，嗱，今日重陽拜山，太一叮唔係講鬼古，所謂鬼巴士即係九巴以空車行駛，假扮載客以掩飾嚴重脫班問題。巴士公司先係班次失準，繼而以鬼巴篤數，運輸署居然又係一舊雲咁懵然不知，如果唔係申訴專員公署話要主動調查，港產官僚仲喺度遊緊魂。

巴士係普羅市民最主要交通工具之一，運輸署監管甩甩漏漏，服務點會好呢？呢個懶散部門咁鬼混帳，唔好叫運輸署嘞，改名叫混帳署啦，叮！

話時話，真正撞鬼嘅應該係運輸署至啱，巴士公司偷雞違規，港產官僚次次都睇唔到嘅，係咪鬼揞眼呀？定係鬼迷心竅，學咗過氣特首曾蔭權嘅衰嘢，返工唔係為市民服務，而係為商界服務？

監察團體就講得啱嘞，巴士公司慳就慳到盡，賺就賺到盡，以致巴士脫班同廣告時間超標等問題叢生，反而成日加價，港府應訂立罰則，加強監管。

混帳署署長……唔係，運輸署署長楊何蓓茵，聽唔聽到呀？唔該即刻行動啦。不過咁，太一叮提醒你，要加強監管嘅，唔止巴士公司，仲有你班下屬，叮！