政壇：政商定格：葉劉林鄭一飯泯恩仇
曾經形容政務司司長（CS）林鄭月娥係「妹妹」、話唔想做妹妹下屬嘅新民黨主席葉劉淑儀，自從再次進身行會後，即刻同妹妹老友番，尋日去埋山頂白加道CS官邸同妹妹食晏，仲影埋相放上網，感情好到似足兩姊妹，真係大開眼界。
葉劉喺社交網站嘅留言，唔再用「妹妹」來形容林鄭，而係稱呼對方「舊同事」，仲話二人過咗個好溫馨嘅一小時，三餸一湯有蒸魚又有咕嚕肉，食完仲歎杯茶至走人。兩人以行動粉碎不和謠言，呢次算唔算係一飯泯恩仇呢？
今次重返行會，但原來葉劉唔使再次宣誓，因為九年前做保安局局長時宣咗誓，保密已經係終身責任，無論離開官場幾多年都依然生效。