政壇：搞搞政：架構重組擱置 譚志源執番身彩

政府架構重組早前宣布擱置，回想政府喺上屆立法會動議優先審議架構重組方案，結果被泛民主派批評為打尖，最終欠缺新民黨葉劉淑儀嘅關鍵一票，令方案打尖不成。雖然葉劉當時被千夫所指，有人亦話佢激嬲咗有關方面，因而無望入行會，但點解最後佢又入到行會呢？

有政界人士透露，有關方面覺得方案打尖審議不成，反而因禍得福，否則方案經過審議同最後通過埋，政府都唔知可以搵邊個出任新增嘅職位，而早前亦有個別新局長出現負面新聞，打擊政府管治威信。

再者，喺依家呢個火頭四起兼不斷撲火嘅政治環境，多一個高官等於為反對派增加多一個箭靶，所以有關方面認為按兵不動、維持原有架構會較為有利，否則當局只會變相為自己埋下炸彈，添煩添亂，反而依家有更多時間兼顧同推動更多利民措施。話時話，負責推銷架構重組方案嘅政制及內地事務局局長譚志源，回想今次架構重組方案一波三折後暫時擱置，唔知會唔會大呼好彩呢？