政壇：慢必掀立會同志熱

人民力量「慢必」陳志全成功喺立法會新界東直選勝出後，隨即承認自己係同志，成為立法會首名同志議員，亦因為呢位「出櫃」議員，議會掀起一股同志熱，令一直致力推動同性戀平權運動嘅工黨Cyd何秀蘭唔使咁辛苦。

阿Cyd推平權動議

話說慢必受到台灣同志遊行聯盟邀請，星期六會飛去台北出席一年一度嘅《台灣同志遊行》。佢話呢個活動已經舉辦到第十屆，但之前一直冇機會參與，所以都幾期待。佢仲透露到時會以立法會議員身份代表香港上台發言，內容大致係呼籲選民唔好因性取向而唔投票畀有心服務市民嘅同志從政者，同埋鼓勵更多同路人「出櫃」喎！

無獨有偶，阿Cyd將會喺下月七號嘅立法會大會提出有關「同志平權」動議辯論，入面將首次加入「反性傾向歧視」等條文，以及要求當局就立法展開諮詢。

阿Cyd話有關平權動議係首次喺立法會提出辯論，可以話係史無前例，驚動議嘅字眼太負面嘅話，會引起其他議員反感，所以佢會用較為正面同平實嘅字眼，希望博得更多議員支持。

慢必就話會先睇吓議案內容，再決定會唔會就原動議提修正案，但佢認為一開始就提出平權，可能跳得太快，既然阿Cyd嘅動議有提及嘅話，咁佢到時發言都會提出，仲會講到明要逐步逐步嚟。若果慢必肯以用家身份企出嚟現身說法嘅話，相信一定會增加議案支持度。