牛肉百元一斤 港人無啖好食

通脹如虎，香港有難。港元持續貶值，百物騰貴，港人冇啖好食。呢嗱，又到牛肉加價喇，基層市民隨時要學古人嘆句「食無肉」都似。

唔係靠嚇o架，本港活牛批發價尋日起每擔加四百三十蚊，改良牛加幅近一成三，肥牛加幅亦近一成二，今次係唔夠兩個月內第二次加價o架喇。業內人士估計，牛肉零售價短期內隨時衝破一百蚊一斤大關，創歷史新高，問你怕未。

代理商五豐行話，內地供應持續緊張，加價係為咗保障供港活牛嘅質量同供應喎。查實除咗供應緊張，人民幣近排係咁升值，牛肉來貨成本不斷增加，唔加價至奇。

呢，人民幣匯價日前再創新高，兌港元突破八算大關，而且高處未算高o架。正如財金專家警告，人民幣升勢可能仲會持續一段時間，市民有排捱。係人都知，本港大部分民生用品及食品由內地入口，港幣貶值，物價上升，勢必帶來通脹壓力，呢個道理好簡單嘅啫。

民以食為先，人民幣升值嘅負面影響，最先反映喺食品價格方面，無論新鮮肉類、雞蛋、食米、蔬菜或罐頭食品，無一幸免，都有加價壓力，普羅市民首當其衝，基層家庭百上加斤，就算勒緊褲頭，節衣縮食都唔掂喇。

物價飛漲，民生艱難，弊在香港社會愈來愈政治化，政客淨係識嘈喧巴閉，對民生議題闊佬懶理。加上弱勢政府動輒得咎，施政處處受掣肘，無論推出乜嘢惠民措施都會遇到政治阻力，正式係推出一項，跪低一項，講起簡直可悲。

好似長者生活津貼咁，老人家只要簡單申報入息及資產，每個月就可以領取二千二百蚊，就算唔足以應付生活所需，總算好過冇，預料四十萬長者可以即時受惠。點知有啲議員唔賣帳，堅持要取消資產申報，仲要求延期審議添，搞到有關計劃半天吊，幾時至可以正式落實，依家仲係未知之數。

民生無小事，唔止係施政口號，亦係社會共識。家陣百物騰貴，通脹肆虐，長者捱窮，點樣搞好經濟，改善民生，政府有責任，議員亦有責任，希望你哋做番啲正經事，唔好係又嘈，唔係又嘈，搞到永無寧日喇，叮！