Sun奇古怪：Sun潮語：【水怪】

提起「水怪」你會諗起啲乜？經典?奧運游水冠軍水怪史匹茲？蘇格蘭尼斯湖水怪？定係其他不為人知嘅水中怪物？畀着我，只會諗起一啲吹水當秘笈嘅高官同政客，又或者以吹水為生嘅sell屎同吹水唔抹嘴嘅富二三代。佢哋呢批人，咪就係潮語所講嘅「水怪」囉。

潮語「水怪」就係形容一啲人，吹水吹到成精成怪，無時無刻滔滔不絕喋喋不休，係「吹水怪」嘅簡稱。

有人話「吹水」係監房術語，因為香港人最先認識「吹水」應該係嚟自發哥經典電影《監獄風雲》。片中角色經常在休息時間傾偈籌備作反時，當懲教人員路過問他們在講乜嘢時，他們都例牌回答：「阿Sir…吹水啫！」。不過據了解，吹水應該嚟自社團，所謂吹水應該係有吹風嘅意思，即係有啲行動其實未firm又或者只係草擬階段，就吹定一啲風出嚟，等對家以為己方有所動作。真作假時假亦真，係兵法嘅一種。

「吹水」這個詞本身都有幾重意思，其中可以解啲人大吹大擂，明明平平無奇嘅事被佢吹到天花龍鳳，又或者係吹牛自大，同普通話「吹牛皮」意思差不多。再者今時今日，好多人都鍾意將普通朋友間偈傾，都叫吹水。因為可能依家啲人，連朋友間都無真傾偈，所謂見面飲吓茶都係屬於低質素交談，屬吹水一種吧。「吹水」另一個意思係講大話，又或者講咗就算，有時啲「水怪」仲好鍾意反責怪佢嗰啲人，最常見嘅句式係：「吹吓水啫！你唔係當真呀？」

一班朋友中，總有一兩個「水怪」，一個社會就會有千百個「水怪」！呢個推斷都相當合理，你睇吓啱啱開始嘅立會，睇吓我哋選咗幾多「水怪」入局？尤其睇到某政黨女副主席，為保某負民望官員，發言邏輯混亂內容欠奉，呢啲就真係「水怪」啦！係又「水」又「怪」呀！