政壇：梁福元娶新抱盆菜饗客
好多新人趁龍年拉埋天窗。嚟緊十一月，霍家喺灣仔會展筵開數百席娶新抱，元朗十八鄉嘅梁家亦都會筵開數百席盆菜宴娶新抱，講緊嘅咪係元朗十八鄉鄉事委員會主席梁福元囉。
各處鄉村各處例。新界原居民結婚喜慶嘅傳統習俗到依家仍然保留，除咗新人要拜祠堂外，主人家仲會喺一啲室外嘅空地大擺盆菜宴，同親朋戚友共嘗農村風味，以及體驗吓圍村傳統氣氛。梁福元喺下月娶新抱時亦將筵開三至四百圍盆菜宴，仲邀請咗唔少政商界名人出席添，咁多猛人聚首一定相當熱鬧。
原來盆菜宴只係一部分，據講榮升老爺嘅梁福元仲會再擇好日子到酒樓擺酒，認真夠派頭。不過，曾經話過因為鍾意整齊清潔而經常着白衫白褲嘅梁福元，唔知到時係咪會換番套紅衫紅褲呢？