政壇：氣功美顏穩陣名媛心動
醫學美容肇禍引起全城愛靚一族關注，日前「健康快車」喺灣仔君悅舉行十五周年慈善晚宴，太子珠寶鐘錶主席鄧鉅明都有買枱做善事，一晚籌得二百五十萬元。鄧鉅明太太鄧宣宏雁（Emily）就請埋愛沙尼亞共和國名譽領事林建康夫婦出席，講到美容之道，鄧太話，有意學氣功嚟美容喎。
被問到會唔會幫襯醫學美容？鄧太指住面頰上嘅雀斑話：「你見我咁多斑，就知我乜都唔整啦！」不過，Emily就對學氣功心郁郁，坦言見朋友學氣功後面色紅潤有光澤，佢又話，自己戒吃紅肉多年，只食白肉。佢嘅好友林太黃寧艷就直言只敢做傳統美容，激光都唔敢試，事關皮膚太薄，寧願勤煲靚湯滋潤吓，肌膚一樣咁靚。
林建康夫婦（左及中）與鄧宣宏雁（右）出席健康快車慈善晚宴，兩位靚太都有自然美容秘方。