政壇：公文袋反口覆舌

新一屆立法會拉開序幕後，各大政團同議員都開始搶佔議題主導權，仲紛紛向政府提動議或質詢，其中備受關注嘅新界東北發展計劃，就成為兩大泛民政黨白鴿黨同公文袋都關注嘅戰場，公文袋由梁家傑同陳家洛先後出招，白鴿亦有劉慧卿出擊。政務司司長林鄭月娥踢爆公文袋曾經撐過計劃，依家就問題多多，果然梁家傑同黨友就質詢再質詢，問題多籮籮，難怪畀人話佢哋圖以質詢掩飾騎牆甚至轉軚嘅意圖，反口覆舌喺政圈常見，只係包裝手法有高低！

林鄭踢爆曾經支持

立法會每逢周三嘅大會都十分重要，更係議員爭取曝光嘅好時機，搶議題、提質詢更有助提升議員知名度，未來兩個星期三嘅大會，白鴿黨同公文袋就爭提新界東北發展計劃嘅跟進，公文袋新丁陳家洛有份提質詢，連畀林鄭踢爆本來撐新界東北發展嘅梁家傑都會提書面質詢，佢哋夾擊政府外，當然仲有同已搶先發功嘅劉慧卿拗手瓜之嫌。

正如林鄭月娥話有啲黨同人「依家問題多多」，梁、陳二人就落力質詢，大部分都集中區內嘅發展規劃，甚至攞埋發展數據嚟質問政府，好似為公文袋之前支持、依家反對鋪路搭橋咁。

其他政團一樣搏到盡。好似工聯會就喺呢幾次大會力谷新星，鄧家彪同郭偉強會問強積金同最低工資，麥美娟就問政府會唔會設新街市，連同陳婉嫻同王國興，佢哋三次大會就搶戰五條口頭質詢同兩條書面質詢。