住宅用地多廢料 規劃失當何時了

俗語話，蜑家雞見水，有得睇，無得飲。講到呢份可望而不可即嘅無奈，升斗市民就最清楚嘞，例如豪宅屋苑嘅保安員啦，排隊上樓嘅公屋清潔阿嬸啦，甚至日日望樓興嘆嘅無殼蝸牛，理論上全部都係樓市蜑家雞。

不過，講到全港最大嗰隻蜑家雞咯喎，唔係市民，而係港府。分別係，港府唔係蜑家雞見水，而係蜑家雞見地，有得睇，無得用，叮！

無地就話無得用啫，點解有地都可望不可即呢？咁怪誕嘅問題，等港產官僚親自解答啦。發展局公布全港二千幾公頃空置住宅用地，未經批租嘅一般住宅用地佔咗九百五十公頃。本來唔錯o架，如果全部用嚟建屋安民，前朝政府遺留嘅房屋短缺爛攤子應該可以紓緩唔少。

但可惜吖，香港有用嘅地同有用嘅官一樣咁少。睇真啲，近千公頃所謂住宅用地大部分根本唔適合發展，好多唔係道路、斜坡、工地就係細於五百平方米嘅零碎地塊，剩餘可供發展嘅土地實際不到一半，只有三百九十幾公頃。

最離譜嘅係，碩果僅存嘅三百幾公頃土地當中，居然亦唔係全部啱用喎，有啲又話受天然斜坡所限，有啲又話附近住宅密度太高，總之結論就係未必適合起樓。所以咯喎，港府家陣嘅困境就似一隻蜑家雞咁，土地儲備多如浩瀚汪洋都無用，根本大部分都唔可以建屋，咁咪即係嘥氣！

嗱嗱嗱，住宅用地多廢料，呢個消息好得人驚o架。係人都知，土地同房屋嘅關係就係麵粉同麵包，家陣大部分麵粉報廢，麵包點樣增加供應呀？如果麵包繼續供不應求，價格又點會唔長升長有呀？如果樓價租金再咁升落去，無殼蝸牛幾時至可以安居樂業呀？

更得人驚嘅係，港產官僚究竟點做規劃o架？明明列明係可發展住宅用地，點解最後走晒樣，變成又道路，又斜坡，又住宅密度過高，結果不適合起樓呢？睇嚟港府建屋安民無計可施，除咗欠缺有用土地，更加缺乏有用官僚！

叮佢個鎯鎯，港府無乜銀用，都話可以度橋搵銀，無乜地用去邊度闢地建屋？官老爺規劃失當嘅老毛病幾時至肯改呀？

正如特首梁振英話齋，唔好再蹉跎歲月嘞，港產官僚快快做好土地規劃，發展新界東北又好，善用荒置咗嘅政府用地都好，總之盡快闢地建屋，唔可以搞到市民永遠做樓市蜑家雞，叮！