SUN微博：打橫嚟講：國民教育好材料

呢個香港童軍總會，真不知所謂，自我弱能化，好做唔做，在現今政治亂局中，潑出一桶污水，添煩添亂，令香港政府尷尬。

事緣，香港童軍總會八月號月刊，刊登了一張台灣和香港童軍合照的相片，好端端，充滿陽光氣息的大合照，卻被該刊編輯做了手腳，搞衰晒，佢哋刻意用電腦將台灣童軍制服上的一面小小「國旗」徽章模糊塗紅，核核凸凸的一撻紅印，好篤眼篤鼻。事件被揭發後，激起一批示威者持多面「青天白日滿地紅」的中華民國國旗到童軍總部抗議，唉！真係唔衰攞嚟衰不特止，仲反映佢哋奴化兼無常識。

家陣，香港政府不停口話要推行「國民教育」，嗱！「青天白日滿地紅」正正就是最佳的教育內容之一，讓此地新一代中華兒女得悉中國苦難，如何自勉強盛的起因，「青天」是甚麼、「白日」代表乜、「滿地紅」的悲壯。若咁都自我閹割，抹掉事實真相，仲係一個中國人嚟o架咩？

當台灣的連戰和謝長廷也得到中國大陸高調款待，與領導人擁抱談歡時，一面「血脈相連」、「可歌可泣」的中國旗，有何不見得人之處？如果連呢面「國旗」也成為忌諱，咁「國父」孫中山咪要永久delete？

中台兩岸開放交流，再無敵我對壘，想不到，香港地仲有啲唔係無知，就係奴才，做埋啲白癡癡嘅低能事！仲話「日行一善」？唔該，每日做少件反智嘅嘢，當幫忙吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：狗噏罵港人

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot