政壇：政商定格：仁濟嫁女總理開心到賀

仁濟醫院靚女總理兼江源集團太子女Tracy吳春秀，上周六同拍拖年幾嘅內地金融才俊殷月拉埋天窗。Tracy幾度開心落淚，見證婚禮嘅親友們都被感染。仁濟主席Edwin鄭承隆形容今次係歷史罕見嘅仁濟嫁女盛事，事關董事局內未嫁嘅女總理一向唔多，當日竟然有多達十五位總理到場觀禮，難怪佢笑稱董事局開會都冇咁齊人喇！

Tracy爸爸兼江源集團董事長吳鎮明表現依依不捨，佢話有六個仔，但只得Tracy一個寶貝女，一提到愛女出嫁就哽咽。親家奶奶殷媽媽好識做，公開讚新抱德才兼備、乖巧懂事，多謝吳家栽培咁好嘅女畀佢，仲話阿仔娶到Tracy係前世修來嘅福氣。新奶奶愈講愈激動，仲眼濕濕舉手發誓話會睇實個仔，唔畀佢變心，一眾親友聽到拍爛手掌。

記者追問已有女友嘅Edwin有冇些少衝動想結婚？啱啱加入新民黨做副主席嘅Edwin無厘頭搞笑話：「要問葉太（新民黨主席葉劉淑儀）先！」唔通黨員結婚都受黨紀約束？