政壇:搞搞政:CY冇提青山激親發叔

話說特首CY梁振英到立法會發言講施政理念,除咗有啲泛民主派議員「無中生有」話要有答問環節外,原來亦有建制派中人有心事。講緊嘅係身兼屯門區議會同新界鄉議局主席嘅劉皇發。話說CY喺結語部分,感性話香港唔係少數人嘅香港,係七百萬人嘅香港,從太平山、獅子山、八仙嶺同鳳凰山俯瞰香港,睇見繁華嘅一面,亦看見發展嘅迫切需要,點知發叔話佢冇提及青山喎!

發叔話CY冇提青山,換言之即係唔重視屯門甚至係佢喎。如果係咁,將來啲高官發言真係乜都要噏齊,莫非要講埋發叔嘅發迹地龍鼓灘先夠尊敬?發叔講講吓,忽然提早預告唔會出席下月一日嘅特首答問大會,原因係本月底會陪太太去到貴州扶貧四至五日,聲稱呢個活動一早安排咗喎。發叔講到咁重視屯門,係咪應該出席答問大會,親自當面問吓CY呢?

第一手消息請下載on.cc東方互動iPhone/iPad/Android/Windows Phone Apps

設計圖片及對白