政壇：鄭錦鐘遊法國獲贈靚酒
識飲識食嘅保良局副主席Eric鄭錦鐘，早前帶同囡囡參加由香港賽馬會主辦嘅訪尋酒莊旅行團，穿梭於著名嘅法國葡萄酒產地波爾多，七日行程參觀咗多個名氣酒莊，有酒莊主人更親自設宴款待。
不過最令Eric窩心嘅，係Guiraud酒莊主人發現十六位團友當中，只有佢同囡囡唔係夫妻檔，莊主即以其囡囡嘅出生年份贈送甜酒一箱，以表達對佢哋父女融洽關係嘅欣賞。
佢又話曾以兩名孫兒嘅出生年份，向St.Emilion酒區嘅Chateau Angelus酒莊訂購印有孫兒肖像嘅紅酒共六百支，並寄存酒莊內，留待孫兒長大後於喜慶日子享用，今次旅程就順道去探吓呢批紅酒喇。
鄭錦鐘（右）獲Lynch Bages（靚次伯）酒莊少東親自接待。（受訪者提供）