政壇：饒宗頤師徒同獲頒博士
浸會大學將於下月頒授榮譽博士學位，五位得主來頭猛，好似綽號「趙樓神」嘅長實集團執行董事趙國雄獲頒授榮譽社會科學博士、諾貝爾物理學獎得主羅伊．格勞伯獲頒授榮譽理學博士、中國古代文明研究學家李學勤獲頒授榮譽文學博士等。而同獲榮譽文學博士嘅「國寶級」國學大師饒宗頤，將會同佢嘅粉絲兼愛徒、SML集團主席Simon孫少文同場獲得殊榮。
Simon啱啱喺本月初獲港大頒授名譽院士，當日饒宗頤都有現身向佢道賀，今次師徒同台領銜，對於佢哋嚟講肯定別具意義。Simon係「饒宗頤學術館之友」創會會長同主席，對九十七歲高齡嘅饒教授尊敬有加，十幾年來致力推動饒老嘅藝術文化，希望年輕一代都認識饒老嘅「東學西漸」主張。
孫少文（右二）將與師傅饒宗頤（左二）同場獲頒榮譽博士。（資料圖片）