政壇：泛民變小學雞嘥時間

特首CY梁振英尋日去立法會講述施政理念，成班泛民議員又為博出位玩嘢，點知玩唔出花樣不特止，反而仲爆添！

話說喺CY出場之前，人民力量嘅黃毓民要重新宣誓，佢事前都講明會玩嘢或加料，終於佢大細聲宣誓，之後就玩離場抗議。跟住到CY上台講嘢，事前一早就講明只係齋講，不設答問，留番下個月答問大會先答議員問題。點知班泛民主派議員好似小學雞咁，仲喺CY答唔答問題上糾纏，嘥咗成二十分鐘。

先係人民力量「大舊」陳偉業叫立法會主席曾鈺成交代點解CY唔接受質詢，之後又到白鴿黨「鐵頭仁」何俊仁引用舊《議事規則》，要求主席畀CY就發言澄清。公文袋黨魁「袋巾傑」梁家傑仲叫主席開先例，去裁決特首係咪有憲制責任澄清發言喎。不過，鐵頭仁就畀曾鈺成寸佢過時，因為鐵頭仁所講嘅條例一早已修改，已經唔適用。呢次小學雞唔得米囉！

後排議員當睇騷

爆嘅除咗鐵頭仁，仲有一向愛搞事嘅社民連「長毛」梁國雄。長毛話以前貪曾去立法會讀錯字，佢要求澄清時貪曾都有講多次。好記性嘅曾鈺成就話：「嗰次係你冇按《議事規則》發言」，長毛嘈多兩句已經畀曾主席趕離場。

坐喺會議廳後排座位嘅體育、演藝、文化及出版界馬逢國見到班小學雞玩嘢，就話立法會好似大舞台，佢坐後面好似睇表演咁。喺演藝界經驗豐富嘅馬逢國就話，暫時未知邊個演技最好，但大舊上次宣誓都口窒窒，應該天分唔係咁高喎。