政壇：劉國勳呻窮搵街坊助養
呢排城中熱捧韓國歌手PSY嘅名曲《江南style》，娛樂圈有人扮，建仔北區區議員劉國勳都被粉絲用佢嘅形象改圖，等佢一嘗客串江南大叔嘅滋味。粉絲咁有心，忙於搞「助養行動」嘅劉國勳都唔客氣，全力籌款做地區工作。
劉國勳雖然係區議會票王，但近日卻有財困。佢話區議員每月營運資助只有二萬二千幾蚊，未計其他雜費，扣除兩位助理人工同辦事處租金，只係得番幾百蚊，依家每月平均要私人倒貼二、三千蚊，至可以處理到佢辦事處數以百計嘅求助同投訴個案。而通脹加上最低工資水平提高，最近佢兩位助理都要求加人工，令佢被迫要向街坊求助。所以，佢近日發起咗個「助養勳勳」行動，呼籲街坊捐錢畀佢做地區工作。
