海難傷痛未平 莫讓慘劇重演

今日係南丫島海難頭七，死者長已矣，生者常戚戚，只有吸取教訓，清除隱患，至可以杜絕慘劇重演，令遇難者安息。

今次海難原因有待調查，責任有待追究，依家最令港人感到震驚及迷惑嘅係：點解意外會造成咁嚴重傷亡？現行法例監管係咪足夠？

海事處處長話喎，二○○○年至今，本港海域平均每年有一百九十五宗船隻碰撞事故，大部分屬輕微碰撞，無人受傷。先唔講呢個數字係高定係低，有一點不可不知，好多情況表面睇冇乜大問題，但唔出事猶自可，一出事就大大鑊，所以大家千祈唔好忽視呢啲所謂輕微碰撞吖。

正所謂，千里之堤潰於蟻穴，平時疏忽咗嘅安全漏洞如果唔及時堵塞，留下後患，積少成多，隨時導致災難性後果。嗱，海事處自己都承認，今次海難之後當局巡查發現，唔少渡輪嘅救生衣擺放位置不當，有啲甚至畀人塞咗入儲物櫃添。大吉利是講句，萬一發生意外，乘客周圍搵唔到救生衣，咁就大劑喇！

仲有吖，現行法例並冇規定本地渡輪上嘅救生衣要配備哨子，亦冇規定救生衣更換嘅年期，換句話講，就算好彩搵到一件亦唔包有「救生」作用。同樣牙煙嘅係，小朋友上觀賞煙花船要着救生衣、船家要備有乘客名單，呢啲所謂指引形同虛設，你話唔驚就假。

呢嗱，本報記者前幾日乘坐渡輪往南丫島時發現，雖然每張座椅下都有救生衣，但點樣攞同着，乘客只能斷估，有啲救生衣好易攞到，有的就要幾經辛苦用咗成分鐘至到手。講真，面對災難分秒必爭，任何延誤都可能要付出生命代價o架。

呢個世界最大嘅錯誤，就係同一個錯誤犯兩次。防止悲劇重演，最有效方法就係吸取教訓，防微杜漸，清除隱患，弊在港產官僚經常失憶，每次出事後都大大聲話要加強監管，係威係勢做場大龍鳳，可惜事過境遷，好快就冇咗件事，關人個關。

呢，舊年花園街排檔大火造成九死三十幾傷，當局喺慘劇後大鑼大鼓推出多項改善措施，但跟進不足，監管不力，依家花園街嘅安全隱患依然故我，劏房照樣遍地開花，萬一再發生火警，你話會有乜嘢後果？

唉，香港家陣已經夠悲情、夠混亂嘅喇，唔該港產官僚醒醒定定，除咗加強執法，更要堵塞法例漏洞，唔好等到再搞出人命至知道流眼淚吖，叮！