政壇：搞搞政：胡志偉中山有樓冇得住

新一屆立法會議員近日陸續向秘書處遞交「議員個人利益登記冊」，申報個人利益。白鴿黨中常委胡志偉原來喺中山有物業，呢度仲曾經係佢哋一家度假嘅好去處，不過買樓第二年，胡志偉就被沒收咗回鄉證，幾年都冇得返內地，間大屋有得睇、冇得住。

貴為立法會議員擁有一至兩個物業一啲都唔出奇，奇怪嘅係胡志偉身為白鴿黨中常委，竟然夠膽喺內地買物業？佢話物業早喺二○○○年去中山旅遊時，用二十零萬買入，雖然內地唔少物業都同香港一樣得嗰幾百呎，但實用面積明顯比「嚴重發水」嘅香港高得多，而且中山鄉郊環境優美，對呢間大屋有讚冇彈。由於間屋較大，小朋友活動空間亦多啲，所以佢哋一家都試過趁假期北上度假兩至三次。不過，回鄉證嘅問題的確成為障礙，○一年佢做民主黨中常委時，已經試過被沒收回鄉證，之後幾年都無返去睇過間屋。依家佢又以白鴿黨員身份入主立會，驚唔驚再被沒收回鄉證呢？佢就話「無得驚」喎！